एजेन्सी । भारतमा कोभिड–१९ संक्रमणदर पुनः केही उकालो लागेको छ । विगत ३ दिन लगातार ओरालो लागेको संक्रमित संख्या पुन केही बढेको हो ।
भारतमा पछिल्लो २४ घण्टामा संक्रमित हुनेको संख्या ३ लाख ६२ हजार पुगेको छ । योसंख्या अघिल्लो २४ घण्टामा ३ लाख ४८ हजारको हाराहारीमा थियो ।
भारतीय स्वास्थ्य मन्त्रालयका अनुसार भारतमा पछिल्लो २४ घण्टामा गरिएका १८ लाख ६४ हजार ५ सय ९४ परीक्षणमध्ये तीन लाख ६२ हजार ७ सय २७ मा संक्रमण पुष्टि भएको हो । योसँगै भारतमा कुल संक्रमित संख्या २ करोड ३७ लाख ३ हजार ६ सय ६५ पुगेको छ ।
पछिल्लो २४ घण्टामा भारतमा संक्रमणका कारण ४ हजार १ सय २० ले ज्यान गुमाएका छन् । योसँगै भारतमा २ लाख ५८ हजार ३ सय १७ संक्रमितको मृत्यु भएको छ ।
भारतमा पछिल्लो २४ घण्टामा संक्रमणमुक्त भएका ३ लाख ५२ हजार एक सय ८१ सहित जम्मा संक्रमणमुक्त हुनेको संख्या १ करोड ९७ लाख ३४ हजार ८ सय २३ पुगेको छ ।
कोभिड महामारीको समिक्षा गर्न बुधबार बसेको बैठकमा प्रधानमन्त्री नरेन्द्र मोदीले अक्सिजनको आपूर्ति पहिलो महामारीमा भन्दा तीन गुणा बढाईएको जानकारी दिएको भारतीय सञ्चारमाध्यमले जनाएका छन् । तर त्यहाँको राजधानी दिल्ली लगायत ठूला शहरहरुका अस्पतालहरुमा समेत अक्सिजनको चरम अभाव भईरहेका छन् । अक्सिजनकै अभावका कारण कयौं संक्रमितको ज्यान गएको छ ।
अक्सिजनको उत्पादन र वितरणका लागि बुधबार प्रधानमन्त्री कोषबाट ३ सय २२ करोड भन्दाबढी रकम विनियोजन गरेको त्यहाँका सञ्चारमाध्यमले जनाएका छन् ।
भारतका ३३ भन्दाबढी राज्य र ९० प्रतिशत भन्दाबढी भूभागमा लकडाउन जारी रहेको छ ।
आइ.एन.ए
