काठमाडौं, १३ साउन । नेपाली राष्ट्रिय क्रिकेट टिमका लेग स्पिनर सन्दीप लामिछानेले खेल्ने क्यारेबियन प्रिमियर लिग सीपीएल टी–ट्वान्टी क्रिकेटको खेल तालिका सार्वजनिक भएको छ । सीपीएलले ट्रीनिडाड एन्ड टोबागोमा आगामी अगष्ट १८ बाट सुरु हुने गरी खेल तालिका सार्वजनिक गरेको हो ।
खेल तालिका अनुसार उद्घाटन खेलमा ट्रीनबागो नाइट राइडर्स र गुएना अमेजन वारिवर्स भिड्ने छन् ।यस्तै पहिलो दिन अर्को खेल समेत हुनेछ । जसमा बार्बाडोस ट्राइडेन्ट्स र सेन्ट किट्स एण्ड नेभिस प्याट्रीओट्सबीच खेल हुनेछ । प्रतियोगितामा हरेक दिन दुई खेल हुनेछन । फाइनल खेल सेप्टम्बर १० मा हुनेछ।
बन्द रंगशालामा हुने खेलमा खेलाडी र आयोजकले सरकारको गाइडलाइन पालना गर्नु पर्नेछ ।यस सिजन सन्दीपले जमैका तलावाजबाट खेल्ने छन् । जमैका तलावाजले ९० हजार अमेरिकी डलर १ करोड ८ लाख नेपाली रुपैयाँमा सन्दीपलाई अनुबन्ध गरेको हो ।सन्दीपले यस अघि सेन्ट किट्स एन्ड नाभिस प्याट्रियट्स र बार्बाडोस ट्राइडेन्ट्सबाट खेलेका थिए ।कोरोनाको कारण हवाई उडान नहुँदा यस सिजन सन्दीपले खेल्ने र नखेल्ने अझै अन्योलमा रहेको छ ।
