मेघराज खड्का
११ माघ,रुकुम
रुकुममा केन्द्रिय बिद्युत लाईनको बिद्युत बल्न थालेको छ । केन्द्रिय लाईन बिस्तारको लागि कात्तिक दोस्रो साता नेपाल बिद्युत प्राधिकरणको खलंगा बितरण केन्द्र कार्यालय उद्घाटन गरि तिब्र गतिमा काम थालिएपछि विद्युत वल्न थालेको हो ।
खलंगा वितरण केन्द्रका प्रमुख दिवाकर प्याकुरेलले मुसीकोट सम्ममा शीतलपाटी–मुसीकोट केन्द्रीय प्रसारण लाइनको बिद्युत सञ्चालनमा आएको जानकारी दिनुभयो । अहिले परिक्षण प्रशारणका रुपमा बिद्युत लाईन सञ्चालनमा आएको छ । बिद्युत प्राधिकरणको क्षेत्रिय कार्यालय नेपालगञ्ज संग थप समन्वय गरेर केहिदिनपछि नियमित रुपमा बिद्युत सञ्चालनमा आउने योजना रहेको छ ।
तत्काल केन्द्रिय लाईन सल्यान रुकुम सडक खण्ड आसपासका बजार केन्द्र र सदरमुकाम खलंगामा सुचारु भएको छ । प्राधिकरणले नै उत्पादन गरेको तर यसअघि लिज मार्फत ठेक्कमा सञ्चालन हुदै आएको स्यार्पुतालबाट उत्पादित बिद्युत पनि पुनः प्राधिकरणकै मातहतमा सञ्चालनमा आएको छ । हाल उक्त बिद्युत बाँफिकोट देखि सल्ले सम्म सञ्चालनमा रहेको छ भने सदरमुकाम खलंगामा रहेका ३ वटा ट्रान्समिटर मार्फत केन्द्रिय लाईनको बिद्युत सञ्चालन गरिएको हो ।
यसअघि रुकुमेली बिद्युत उर्जा विकास उपभोक्ता समिति रुकुमले सञ्चालन गर्दै आएको सम्पुर्ण प्रकृया अब खलंगा बितरण केन्द्रबाट नै हुनेछ । सदरमुकाम खलंगाको सेरिगाउँमा रहेको बितरण केन्द्रको कार्यालयबाट नै अब ग्राहकहरुले ग्राहक सेवा र शुल्क बुझाउने काउन्टर रहने छ । रुकुममा केन्द्रिय लाईन विस्तारका लागि काम थालेको करिब एक दशक पछि केन्द्रीय प्रसारण लाइनको बिद्युत मुसिकोटमा बलेको हो । यसअघि रुकुममा केन्द्रीय लाईन विस्तारका लािग पहल गरिएको भएपनि दशक सम्म काम रोकिदा गाडिएका पोल तथा तारहरु अलपत्र परेका थिए ।
मुसीकोटसम्म आउने केन्द्रीय बिद्युतको ११ केभी क्षमताको हो । त्यस्तै यस क्षेत्रको बिद्युतका थप व्यवस्थित र स्थानीय स्तरमा उत्पादित बिद्युतलाई केन्द्रीय लाईनमा जोड्न शीतलपाटीमा सबस्टेसन निर्माणको काम पनि अन्तिम चरणमा रहेको छ भने रुकुममा पनि सव स्टेशन बनाउने योजना बनेको छ । शीतलपाटीको सबस्टेसन निर्माणपछि मुसीकोटमा भने ३३ केभी क्षमताको बत्ति बल्ने छ ।
रुकुम बितरण केन्द्र उद्घाटन क्रममा पुगेका उर्जा मन्त्री जनार्दन शर्माले काम थालेको ४ महिना भित्रै रुकुममा केन्द्रिय बिद्युत बिस्तार हुने जानकारी र कर्मचारीहरुलाई निर्देशन दिनुभएको थियो । यस अनुसार कार्तिक दोस्रो साता देखि शुरु भएको काम चार महिना भित्रै अर्थात माघ दोस्रो हप्तामै बिद्युत सञ्चालनमा आएको हो ।
रुकुममा केन्द्रित बिद्युत लाईन बिस्तार हुन थालेपछि रुकुमेलीहरु खुसि भएका छन । यसअघि स्थानीय उत्पादनबाट नै बिद्युत बाल्दै आएका रुकुमेलीले दैनिक २० घण्टा बढी लोडसेडिङको मार खेप्दै आएका थिए ।
