कैलाली, २६ माघ । नेकपा एमालेका नेता माधव नेपालले माओवादीसँगको एकता प्रक्रिया अन्तिम चरणमा पुगेको दाबी गरेका छन् ।
एमालेले ‘जनताको बहुदलीय जनवाद’ र माओवादीले ‘माओवाद’ भनिरहेकाले दुबै विचारलाई मिलाएर पार्टी एकता हुन लागेको नेता नेपालको भनाइ छ ।
कैलालीको टिकापुरमा भएको कार्यक्रममा बोल्दै उनले पार्टी एकता सुनिश्चित भएको बताउँदै नयाँ पार्टीको नाम ‘नेपाल कम्युनिष्ट पार्टी’ राख्ने सहमति भइसकेको खुलासा समेत गरेका छन् ।
वाम एकता जनताले नै रुचाएको भन्दै नेता नेपालले कुनै शक्तिले एमाले र माओवादीलाई मिल्नबाट रोक्न नसक्ने ठोकुवा समेत गरेका छन् । उनले एकता प्रक्रिया लामो हुने भएकाले सरकार गठनसँगै एकता प्रक्रियालाई अघि बढाइने बताए ।
