काठमाडौं । २३ वर्षमुनिको एएफसी च्याम्पियनसिप फुटबल छनोट प्रतियोगिता खेल्न नेपाली टीम आज संयुक्त अरब इमिरेट्स (युएइ) जाँदैछ ।
नेपाली टोली बिहान फ्लाइ दुवाइको विमानमार्फत युएइ जान लागेको हो । प्रशिक्षक राजुकाजी शाक्यले नेपाली टोली प्रतियोगितामा छनोट हुने लक्ष्यसहित जान लागेको जानकारी दिए ।
शाक्यले छनौट प्रतियोगिता नेपालका लागि कठिन भएपछि छनौट भएर फर्कने बताए । बंगलादेशसंगको मैत्रीपूर्ण फुटवलको नतिजाले खेलमा देखिएका कमजोरी हटाउन सहयोग गरेकाले पनि छनोट हुने सम्भावना धेरै रहेको उनले बताए ।
प्रतियोगिताको समूह ‘डी’मा रहेको नेपालले शनिबार युएईसँग उद्घाटन खेल खेल्दैछ ।
नेपालले सोमबार उज्वेकिस्तानसँग र बुधबार लेबनानसँग खेल्नेछ । सन् २०१८ मा चीनमा हुने एएफसी २३ वर्षमुनिको फुटवल च्याम्पियनसिपको छनोट चरणमा सहभागी ४० टोलीलाई १० समूहमा विभाजन गरिएको छ ।
प्रत्येक समूहका समूह विजेता र १० समूहका उत्कृष्ट पाँच उपविजेता टोली छनोट हुनेछन् । आयोजकका हैसियतले चीन भने प्रतियोगितामा सिधै छनोट हुनेछ ।
