काठमाडौं, २२ असार । प्रमुख प्रतिपक्षी नेपाली काँग्रेसले नियमावली विपरित प्रतिनिधिसभाको शुक्रबारको बैठक अवरुद्ध पारेको सरकारले आरोप लगाएको छ ।
कानुन, न्याय तथा संसदीय मामिला मन्त्री शेरबहादुर तामाङले प्रमुख प्रतिपक्ष नेपाली काँग्रेसले संघीय संसद नियमावली विपरित प्रतिनिधिसभाको बैठक अवरुद्ध गरेको आरोप लगाएका छन् ।
काँग्रेसले जरुरी सार्वजनिक महत्वको प्रस्ताव दर्ता गरेलगत्तै छलफल गर्न माग गर्दै प्रतिनिधिसभा अवरुद्ध पार्नु संसद नियमावली विपरित रहेको उनको दावी छ ।
मन्त्री तामाङका अनुसार जरुरी सार्वजनिक महत्वको प्रस्ताव संसदमा दर्ता गराएको २ घण्टा अघि तत्सम्बन्धमा संसदमा छलफल गराउन नमिल्ने नियमावलीमा व्यवस्था छ ।
सो व्यवस्था विपरित काँग्रेसले तत्काल कार्यसूचिमा राखेर छलफल अघि बढाउन माग गर्दै बैठक अवरुद्ध पार्नु विधिको उलंघन भएको मन्त्री तामाङको तर्क छ ।
मन्त्री तामाङले जुम्लामा आमरण अनसनमा बसेका वरिष्ठ चिकित्सक गोविन्द केसीको स्वास्थ्यको जिम्मेवारी सरकारले लिने बताए ।
काँग्रेसको तर्फबाट सांसदहरु दिलेन्द्रप्रसाद बडु, पार्वता बिसी चौंधरी र अजहर कमल मुसलमानले प्रतिनिधिसभा बैठक बस्नु केहीबेर अघि वरिष्ठ चिकित्सक केसीको जीवन रक्षा र चिकित्सा राष्ट्रिय शिक्षा विधेयक जस्ताको तस्तै कार्यसूचिमा राखेर छलफल अघि बढाउन माग गर्दै जरुरी सार्वजनिक महत्वको प्रस्ताव दर्ता गराएका थिए।
काँग्रेसको सो माग संघीय संसद नियमावली विपरित रहेको कानुन मन्त्री तामाङको दावी छ । सो सार्वजनिक महत्वको प्रस्ताव सम्बन्धित मन्त्रीसँग छलफल गरेर मात्रै अघि बढाउने व्यवस्था संघीय संसद नियमावलीमा गरिएको छ ।
सोही व्यवस्था अनुसार शिक्षा, विज्ञान तथा प्रविधिमन्त्री गिरिराजमणि पोखरेल राजधानी बाहिर रहेकाले उनी आएपछि सो सार्वजनिक महत्वको प्रस्तावमाथि छलफल अघि बढाउन प्रतिनिधिसभाको बैठक सोमबारसम्म स्थगित गर्नु परेको संघीय संसद सचिवालयले जनाएको छ ।
