एजेन्सी, ३१ चैत । भारतमा पछिल्लो २४ घण्टामा एक लाख ६१ हजार ७ सय ३६ जनामा कोरोना संक्रमण पुष्टि भएको छ ।
भारतीय स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा कोरोना संक्रमित पुष्टि भएका एक लाख ६१ हजार ७ सय ३६ सँगै भारतमा संक्रमित हुनेको कुल संख्या एक करोड ३६ लाख ८९ हजार ४ सय ५३ पुगेको छ ।
जसमध्ये एक करोड २२ लाख ५२ हजार ६ सय ९७ जना संक्रमणमुक्त भईसकेका छन् भने सक्रिय संक्रमित १२ लाख ६४ हजार ६ सय ९८ रहेका छन् ।
पछिल्लो २४ घण्टा भारतमा आठ सय ७९ जनाको मृत्य भएको छ । योसँगै भारतमा कोरोनाका कारण मृत्यु हुनेको संख्या एक लाख ७१ हजार ५८ पुगेको छ ।
पछिल्लो २४ घण्टामा भारतमा ९७ हजार १ सय ६८ जना संक्रमणमुक्त भएका छन् ।
संक्रमण दर उच्च भएसँगै रसियामा बनेको कोरोनाविरुद्धको खोप स्पुतनिक भी ले भारतमा आकस्मिक प्रयोगका लागि अनुमति पाएको छ । रसियन खोप स्पुतनिक भीको प्रयोगको लागि भारतमा सोमबारबाट अनुमति दिइएको हो ।
भारतमा प्रयोगको लागि अनुमति पाउने यो तेस्रो खोप हो । यसअघि भारतमा कोभिसिल्ड र कोभ्याक्स नामक दुई खोपहरु लगाइँदै आएको छ ।
हालसम्म भारतमा १० करोड ८५ लाख ३३ हजारभन्दा बढीले कोरोनाविरुद्धको खोप लगाइसकेका छन्