एजेन्सी, ३० चैत । भारतीय स्वास्थ्य तथा परिवार कल्याण मन्त्रालयका अनुसार भारतमा पछिल्लो २४ घण्टामा एक लाख ६९ हजार ९१४ जनामा कोरोना संक्रमण पुष्टि भएको छ । यो संख्या अघिल्लो दिन संक्रमित हुनको संख्या भन्दा करिब १७ हजारले बढी हो ।
भारतीय स्वास्थ्य मन्त्रालयका अनुसार भारतका १० राज्यहरु महाराष्ट्र, छत्तीसगढ, उत्तर प्रदेश, दिल्ली, कर्नाटक, तमिल नाडु, केरला, मध्य प्रदेश, गुजरात र राजस्थानमा दैनिक संक्रमित हुनेको संख्या उच्च देखिएको छ।
योसँगै भारतमा संक्रमितको कुल संख्या एक करोड ३५ लाख २८ हजार ७ सय १९ पुगेको छ । भारतमा दैनिक संक्रमित संख्या हरेक दिन उच्च हुँदै गईरहेको छ। संक्रमितको संख्यासँगै मृत्युदर पनि बढ्दै गएको छ ।
आइतबार कोरोना संक्रमणका कारण भारतमा ९०४ जनाको मृत्यु भएसँगै भारतमा हालसम्म एक लाख ७० हजार २ सय ९ जना मृत्यु हुनेकाे संख्या पुगेको छ । हाल भारतमा ११ लाख ९५ हजार ९६०सक्रिय संक्रमित रहेका छन्। सक्रिय संक्रमितको संख्या सोमबार १२ लाख कट्ने अनुमान गरिएको छ।