उत्तम रिजाल
झापा, २६ चैत। नेपाल पत्रकार महासंघ झापाको अध्यक्षमा प्रेस युनियन नेतृत्वको संयुक्त प्यानलका एकराज गिरी निर्वाचित भएका छन् ।
उनले प्रेस चौतारीका विशाल नेम्बाङ्ग र तीर्थ सिग्देललाई पराजित गरे । गिरीले कुल खसेको २ सय ५६ मतमध्ये एक सय ५५ प्राप्त गरे भने प्रधानमन्त्री ओली निकट चौतारीका नेम्बाङ्गले ७४ र माधव निकट चौतारीका सिग्देलले २६ मत प्राप्त गरे ।
गिरी प्रेस युनियन नेतृत्वको संयुक्त प्यानलबाट उठेका थिए । झापामा गिरी प्यानलले दब्दबा कायम गरेको छ । उपाध्यक्षमा सोहि प्यानलका केशव भट्टराई निर्वाचित भएका छन् । उनले एक सय ३१ म्त प्राप्त गरेभने उनका निकटतम प्रतिद्धन्द्धी गोपाल झापालीले ९६ र हिमाल खरेलले २६ मत प्राप्त गरे ।
त्यस्तै महिला उपाध्यक्षमा गिरी प्यानलकै सुशीला संग्रौला निर्वाचित भइन् । उनले एक सय ४० मत प्राप्त गरिन भने उनको निकटतम प्रतिद्धन्द्धी चौतारीकी सावित्रा दाहालले एक सय ७ मत प्राप्त गरिन् ।
त्यस्तै सचिवमा पनि गिरी नेतृत्वकै डिकेश लामा निर्वाचित भए । उनले एक सय २८ मत प्राप्त गरेभने उनका निकटतम प्रतिद्धन्दी सुब्रत न्यौपानेले ९९ र प्रेम कुमार आचार्यले २५ मत प्राप्त गरे । सह–सचिव खुल्लामा राजु पाठक निर्वाचित भए । उनले चौतारीका विनोद सापकोटालाई पराजित गरे । पाठकले एक सय ५५ र सापकोटाले ९२ मत प्राप्त गरे ।
समावेशी सह–सचिवमा अर्जुन राजवंशी निर्वाचित भए । उनले एक सय ७२ मत प्राप्त गरे । उनका निकटतम प्रतिद्धन्द्धी देशराज नेम्बाङ्गले ७३ मत प्राप्त गरे । त्यस्तै कोषाध्यक्षमा गिरी प्यानलकै रन्जित प्रसाई विजयी भए । उनले एक सय ३३ मत प्राप्त गरे भने उनका निकटतम प्रतिद्धन्द्धी रमेश तिवारीले एक सय १५ मत प्राप्त गरे ।
सदस्यहरुमा मनिषा चम्लागाई, विनोद पाण्डे, चिरन्जीवी घिमिरे, सुष्मा राजवंशी, होमप्रसाद अधिकारी, द्रोण अधिकारी, रन्जित परियार, राजन साम्पाङ, अच्युतराज सुवेदी, अनिल वाग्ले र सुनिरा मैनाली निर्वाचित भएका छन् ।
त्यस्तै केन्द्रीय परिषद् सदस्यका लागि ४ जना उमेद्धारमध्ये प्रेस युनियन नेतृत्वका दुई जना र प्रेस चौतारीका एक जना निर्वाचित भएका छन् । निर्वाचित हुनेमा कृष्ण हुमागाई, ज्ञानेन्द्र निरौला र गोपाल काफ्ले छन् ।
प्रधानमन्त्री केपी शर्मा ओलीका पूर्व प्रेस संयोजक चेतन अधिकारी भने पराजित भए । झापामा २ सय ६३ मतदातामध्ये २ सय ५६ जनाले मतदान गरेका थिए ।
