अध्यक्ष दाहालले प्रस्तुत गर्नुभएको राजनीतिक प्रस्ताव फिर्ता हुँदैन : भीम रावल

काठमाडौं, ९ मंसिर । नेकपा स्थायी कमिटी सदस्य भीम रावलले कार्यकारी अध्यक्ष पुष्पकमल दाहालले पार्टी सचिवालयमा प्रस्तुत गर्नुभएको राजनीतिक प्रस्ताव फिर्ता नहुने बताउनुभएको छ ।

मंगलबार माउन्टेन टेलिभिजनसंग कुराकानी गर्दै रावलले प्रस्तावमा दाहालले उठाउनु भएका बिषयमा पार्टी अध्यक्ष एवं प्रधानमन्त्री केपी शर्मा ओलीले जवाफ दिनुपर्ने उल्लेख गर्नुभयो । नेता रावलले कसैले चाहदैमा नेकपा नफुट्ने समेत दाबी गर्नुभयो ।

गत कार्तिक २८ गते दाहालले सचिवालय बैठकमा प्रस्तुत गर्नुभएको प्रस्तावका कारण ओली र दाहालबीच तित्तता बढेको छ । दाहालद्वारा प्रस्तुत प्रस्तावमा ओली सरकार संचालनमा असफल भएको आरोप लगाइएको छ ।