वीरगञ्जमा पार्किङ गरिएको बसमा आगजनी

काठमाडौं, ३० बैशाख । नेत्रबिक्रम चन्द नेतृत्वको नेकपा माओवादीले वीरगञ्जमा पार्किङ गरिएको बसमा आगजनी गरेका छन् । माओवादीका कार्यकर्ताले आज विहान वीरगञ्ज बसपार्कमा पार्किङ गरिएको बसमा आगजनी गरेका हुन् । आगजनीका कारण बस क्षतिग्रस्त भएको छ ।
यता, पृथ्वी राजमार्गअन्तर्गत धादिङको धुनिबेशी नगरपालिका–६ स्थित चालिसेमा रोकेर राखिएका दुईवटा कन्टेनर ट्रकमा अज्ञात समूहले आगजनी गरेको छ । क्लिंकर बोकेका भारतीय नम्बर प्लेटका २२ चक्के दुईवटा कन्टेनर ट्रक आगजनीबाट जलेर ध्वस्त भएका छन् ।

पेट्रोल पम्प र ग्यास उद्योग नजिकै रोकिराखेको ट्रकमा आगलागी भएपछि स्थानीयवासी त्रसित भएका थिए । आगलागीपछि विद्युतको तार जल्दा विद्युत् सेवा अवरुद्ध भएको छ । काठमाडौं महानगरपालिकाबाट दमकल मगाएर २ घण्टापछि आगो निभाएको प्रहरीले जनाएको छ । प्रहरीले नेकपा माओवादीका कार्यकर्ताले आगजनी गरेको आशंका गरेको छ ।