एजेन्सी, १४ कात्तिक । भारतको उमरगा तहसीलको तुरोरी गाउँमा आन्दोलनकारीले कर्नाटक डिपोको बसमा आगजनी गरेका छन् । महाराष्ट्रमा मराठा आरक्षण हिंसात्मक बनेको छ। सबैभन्दा बढी प्रभावित बीड जिल्लामा सावधानीका रुपमा कर्फ्यु लगाइएको छ । यहाँ इन्टरनेट पनि बन्द गरिएको छ । जालनामा पछिल्लो १२ घण्टामा तीन जनाले आत्महत्याको प्रयास गरेको भारतीय सञ्चार माध्यम दैनिक भाष्करले जनाएको छ ।
प्रदेशमा दुई दिनमा राज्य यातायात निगमका १३ वटा बसमा तोडफोड भएको छ । जसका कारण २५० डिपोमध्ये ३० वटा बन्द गर्नुपरेको थियो । ढुंगा हानेपछि पुणे–बीड बस सेवा बन्द गरिएको छ । सोमबार राति मराठा समुदायका प्रदर्शनकारीले बीड बस डिपोमा तोडफोड गरेका थिए । करिब एक हजार मानिसको भीड डिपोमा प्रवेश गरी ६० भन्दा बढी बसका सिसा फुटाएको थियो । स्टेशनको कन्ट्रोल रुम समेत तोडफोड भएको छ ।
आन्दोलनकारीहरूले उमरगा तहसीलको तुरोरी गाउँमा कर्नाटक डिपोको बसमा आगजनी गरेका छन् । बसमा ४६ यात्रु सवार रहेका सबै सकुशल रहेका छन् । आगो निभाउन आएको दमकलको गाडी पनि मजदुरले जलाएका छन् ।
आन्दोलनकारीले सोमबार एनसीपीका दुई विधायकको घरमा आगजनी गरेका छन् । बिहान करिब ११ बजे उनीहरूले बीड जिल्लाको माजलगाउँका एनसीपी विधायक प्रकाश सोलंकेको बंगलामा प्रवेश गरी ढुंगा प्रहार गरी आगजनी गरेका थिए । त्यतिबेला विधायक, परिवार र कर्मचारी बंगलामा थिए । दिउँसो बीडमा नै एनसीपीका अर्का विधायक सन्दीप क्षीरसागरको घरमा आगजनी भएको छ । दुवै सांसद सकुशल छन् ।
प्रकाश सोलंके अजित पवार गुटका हुन् भने क्षीरसागर शरद पवार गुटका हुन्। आन्दोलनकारीले बीडको नगरपालिका भवन र नेकपाको कार्यालयमा समेत आगजनी गरेका छन् । यस वर्ष अगस्टदेखि मराठा आरक्षण आन्दोलन चलिरहेको छ। आरक्षणको माग गर्दै गएको ११ दिनमा १३ जनाले आत्महत्या गरेका छन् ।
