दार्चुला। घटना भएको एक महिनापछि दार्चुलाका जयसिंह धामीको घटनामा अनुसन्धान सकेर समितिले छानबिन प्रतिवेदन बुझाएको छ ।
समितिले बुझाएको प्रतिवेदनमा जयसिंह धामीको बेपत्तामा भारतीय सीमा सुरक्षा बल एसएसबीको संलग्नता रहेको देखिएको छ । समितिले एसएसबी माथि छानबिन गरी दोषी उपर कानुनी कारबाही गर्ने सुझाव समेत दिएको छ । दुई जवानले तुइन फुकालिदिएको र धामी महाकाली नदीमा खसेको प्रत्यक्षदर्शीले बताउँदै आएका छन् । यद्यपि, भारतीय प्रशासनले एसएसबीले गस्ती गरेको स्वीकार गरे पनि तुइन नकाटेको दाबी गरेको छ ।
एसएसबीले तुइन नकाटेको दाबी गरे पनि प्रत्यक्षदर्शीहरुले भने तुहिन काटिएको बयान सरकारले गठन गरेको छानबिन समितिलाई दिएका छन् । कल्याण धामी, विक्रम सकेनी र अनिता धामी घटनाको प्रत्यक्ष साक्षी थिए । समितिले मंगलबार गृहमन्त्री बालकृष्ण खाँणलाई प्रतिवेदन बुझाएको छ । जयसिंह धामी साउन १५ गते गाउँबाट सदरमुकाम खलङ्गा आउने क्रममा एसएसबीले तुइन फुकालिदिँदा बेपत्ता भएका थिए ।
सरकारले साउन १७ गते जयसिंहको घटनाबारे अनुसन्धान गर्न गृह मन्त्रालयका सह सचिव जनार्दन गौतमको नेतृत्वमा पाँच सदस्य छानबिन टोली गठन गरेको थियो । प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्नता भट्ट सदस्य रहेका छन् ।
