दैलेख, ६ पुस । दैलेखस्थित ठाटीकाँध गाउँपालिका अध्यक्ष धीरबहादुर शाहीकी श्रीमती इला शाही जंगलमा फेला पर्नु भएको छ तर सँगै अपहरणमा परेका गाउँपालिका अध्यक्ष शाहीको अवस्था भने अज्ञात छ ।
शनिबार राति ठाँटीकाँध गाउँपालिका वडा नम्बर २ श्रीपाटामा रहेको घरबाटै उहाँहरु अपहरणमा पर्नुभएको हो । एक दर्जन भन्दा बढिको संख्यामा आएका अज्ञात समुहले अपहरण गरेको उपाध्यक्ष सुस्मिता सिंहले जानकारी दिनुभयो । अपहरणमा विप्लव समूहको संलग्नता रहेको आशंका गरिएपनि पुष्टि हुन नसकेको उहाँको भनाई थियो ।
यसअघि गाउँपालिका अध्यक्षका भाइ हस्तबहादुर शाहीलाई पनि विप्लव समूहका कार्यकर्ताहरुले अपहरण गरेर केही दिनपछि छाडेको र अध्यक्षलाई पनि सोही समूहले अपहरण गरेको हुनसक्ने प्रहरीले जानकारी दिएको छ ।