काठमाडौं, ५ असोज । तेस्रो संस्करणको साफ यू–१८ फुटबल च्याम्पियनसिपको दोस्रो खेलमा नेपालले भुटानसंग लज्जास्पद हार व्यहोरेको छ । आइतबार हल्चोकस्थित सशस्त्र प्रहरी बलको मैदानमा भएको खेलमा २ पटकको विजेता नेपाल भुटानसँग ३–० गोल अन्तरले पराजित भएको हो ।
पहिलो हाफमा १–० ले पछि परेको नेपालले दोस्रो हाफमा दुई गोल खाएको थियो । हारसँगै समूह ’ए’ मा रहेको नेपालको सेमिफाइनल पुग्ने सम्भावना कमजोर बनेको छ ।
अब नेपालको सेमिफाइनल यात्रा भुटान र माल्दिभ्स बीचको खेलले तय गर्नेछ । उक्त खेलमा भुटानले माल्दिभ्सलाई ३ गोल भन्दाबढीको अन्तरले पराजित गरे नेपाल सेमिफाइनल पुग्ने छ ।
त्यो खेल बराबरी भए वा भुटान पराजित भए नेपाल समूह चरणबाट बाहिरिने छ । नेपालले पहिलो खेलमा गत शुक्रवार माल्दिभ्ससँग १–१ गोलको बराबरी खेलेको थियो ।
