काठमाडौं, १७ माघ । प्रमुख प्रतिपक्षी दल नेपाली कांग्रेसले बिहिवारको संसद बैठक पनि अवरुद्ध गरेको छ । कांग्रेसले चिकित्सा शिक्षा विधेयक सच्याएर अनसनरत डाक्टर गोविन्द केसीको जीवनरक्षा गर्न माग गर्दै प्रतिनिधिसभा बैठक अवरुद्ध गरेको हो ।
सभामुख कृष्णबहादुर महराले विहिबारको प्रतिनिधिसभाको बैठक प्रारम्भ भएको जनाउ दिने वित्तिकै प्रमुख प्रतिपक्षी दल नेपाली कांग्रेसका सांसदहरुले उभिएर विरोध जनाएका थिए । कांग्रेसका सांसदहरुले उभिएर विरोध जनाएपछि सभामुखले कांग्रेस सांसद डाक्टर मिनेन्द्र रिजाललाई बोल्नका लागि समय दिएका थिए ।
बैठकमा सांसद रिजालले प्रतिपक्षी दलको विरोधको आवाजलाई दुई तिहाईको दम्भबाट दबाउने अधिनायवादी शैलीमा सरकार अघि बढेको भन्दै कांग्रेसले सरकारलाई अधिनायवादी बाटोमा हिड्न नदिने चेतावनी दिए ।
रिजालले सरकारले निरिह अनसनकारी डाक्टर केसीको बोली दबाउन दुईतिहाईको दम्भ प्रयोग गरेको आरोप लगाए । उनले रिजालले वार्ता र संवादबाट तत्काल समस्या समाधान निकाल्न सरकारको ध्यानाकर्षण गराए ।
त्यसैगरी कांग्रेसले सभामुखलाई पनि तटस्थकारी भुमिका निर्वाह गर्न ध्यानाकर्षण गराएको छ ।
काँग्रेस सांसदहरुले उभिएर विरोध जनाईरहेपछि सभामुख महराले प्रतिनिधि सभाको अर्काे बैठक आगामी आईतबार अपरान्ह ३ बजे बस्ने गरि बैठक स्थगित गरेका छन् ।