काठमाडौं, २९ भदौ । भारत र अफगानस्तान सम्मिलीत यू–१९ क्रिकेट प्रतियोगितामा नेपालले लगातार दोस्रो हार व्यहोरेको छ । शुक्रबार भारतको लखनउमा भएको खेलमा भारतको ए टिमसँग ८ विकेटले पराजित हुँदै नेपालले लगातार दोस्रो हार व्यहोरेको हो ।
इकाना अन्तर्राराष्ट्रिय क्रिकेट मैदानमा टस जितेर ब्याटिङ रोजेको नेपालले ४५ ओभर ५ बलमा १ सय ६५ रनमा अलआउट भयो । नेपालका तीनजना खेलाडीले मात्रै दोहोरो रन बनाए । जसमा सन्दिप जोराले ६६, त्रितराज दासले ४६ र भिम शार्कीले २८ रन बनाएका थिए । १ सय ४२ रनमा ६ विकेट खेर फालेको नेपालले अरु १४ रन थप्दा अल आउट हुन पुग्यो ।
जवाफमा उत्रेको भारतले २४ ओभर १ बलमा २ विकेट गुमाउँदै लक्ष्य हासिल गर्यो । भारतका लागि अनुज रावतले ४७ रन बनाए भने वाइभी राथोडले ५९ र प्रभासिमरन सिंहले ४६ रन बनाए । बलिङतर्फ नेपालका पवन सराफ र कमलसिंह ऐरीले एकएक विकेट लिएका थिए ।
नेपाल पहिलो खेलमा भारतको बी टिमसँग ४० रनले पराजित भएको थियो ।
