एजेन्सी, १३ बैशाख । च्याम्पियन्स लिगको दोस्रो सेमिफाइनलको पहिलो लेगमा रियल मड्रिड विजयी भएको छ । रियल मड्रिड गएराति बार्यन म्युनिकविरुद्ध उसकै घरेलु मैदानमा २–१ गोल अन्तरले विजयी भएको हो ।
रियल मड्रिडको जितमा मार्सेलो र मार्को असेन्सियोले एक एक गोल गरे । खेलमा एक गोलले पछि परेको अवस्था उल्टाउँदै रियल मड्रिडले फाइनलमा पुग्ने सम्भावना बलियो बनाएको हो ।
बार्यन म्युनिकले खेलको २८ औं मिनेटमा किमिचको गोलमा अग्रता लिएको थियो । तर त्यो अग्रता धेरै समय टिकेन । रियल मड्रिडले खेलको ४४ औं मिनेटमा बराबरी गोल फर्कायो । मार्सेलोले बराबरी गोल फर्काएकामा खेलको ५७ औं मिनेटमा असेन्सिओले निर्णायक गोल गरे ।
फाइनल प्रवेशका लागि यी दुई टीमबीचको दोस्रो लेग आगामी मंगलबार रियल मड्रिडको घरेलु मैदानमा हुने छ ।
