पाकिस्तानद्वारा स्वदेशमै विकसित पहिलो हावाबाट हावामा मार हान्ने क्षेप्यास्त्रको सफल परीक्षण

पाकिस्तानले स्वदेशमै विकास गरेको पहिलो हावाबाट हावामा मार हान्न सक्ने क्षेप्यास्त्रको सफल परीक्षण गरेको छ । पाकिस्तानी सेनाको सञ्चार तथा जनसम्पर्क शाखा (आईएसपीआर) का अनुसार मंगलवार उक्त क्षेप्यास्त्रको उडान परीक्षण सफलतापूर्वक सम्पन्न गरिएको हो । आईएसपीआरले जारी गरेको विज्ञप्तिमा अत्याधुनिक अन्तिम चरणको लक्ष्य निर्देशन प्रणाली जडान गरिएको उक्त क्षेप्यास्त्रले लामो दूरीमा रहेका हवाई लक्ष्यलाई समेत निशाना बनाउन सक्ने उल्लेख छ । यस क्षेप्यास्त्रको विकासले पाकिस्तानी वायुसेनाको सैन्य परिचालन क्षमता र रणनीतिक लचकता बढाउनुका साथै मुलुकको समग्र रक्षा प्रणालीलाई थप सुदृढ बनाउने विश्वास सेनाले व्यक्त गरेको छ । सफल परीक्षणले पाकिस्तानको रक्षा उद्योगले हासिल गरेको प्राविधिक क्षमता, नवप्रवर्तन र आत्मनिर्भरताको उपलब्धि प्रदर्शन गरेको विज्ञप्तिमा जनाइएको छ । परीक्षणको अवलोकन पाकिस्तानी सशस्त्र सेनाका वरिष्ठ अधिकारी, वैज्ञानिक तथा इन्जिनियरहरूले गरेका थिए ।