बिमल जैरु
डडेल्धुरा, १० फागुन ।डडेल्धुरा जिल्ला कारागारमा रहेका कैदीबन्दीहरुले मुडा उत्पादन गरेर मनग्य आम्दानी गर्न थालेका छन् । खेले खेलेर समय बिताउने गरेका कैदीबन्दीहरु पछिल्लो समय मुडा बनाउन व्यस्त छन् ।
डडेल्धुरा जिल्ला कारागारमा रहेका कैदीहरुले खाली समयलाई सदुपयोग गरेर मुडा बनाउन थालेका हुन् । एक कैदीले आफुले सिकेको सीप सबैलाई सिकाएपछि कैदीबन्दीहरु मुडा बनाउन थालेका हुन् । बाँस निगालो, प्लाष्टिकको रसी, सरिया तथा साईकलको टायर प्रयोग गरेर कैदीहरुले मुडा बनाउने गरेका छन् । दिनभरको समय बसेर खेर फाल्नु भन्दा आम्दानी हुने र समयको पनि सदुपयोग हुने भएकाले मुडा बनाउन आकर्षित भएको कैदीहरु बताउछन् ।
४८ जना कैदी रहेको डडेल्धुरा कारागारमा १०–१२ जनाले दिनहुँ मुडा बनाउने गरेका छन् । जेलमै बसेर राम्रो आम्दानी गर्न थालेपछि कैदीहरु खसी भएका छन् । तर राज्यले नराम्रो दृष्टिले हेर्ने गरेको कैदीहरुको गुनासो छ । उनीहरुले बनाएको मुडाले बजार समेत पाउन सकेको छैन । कारागारले भने कैदीबन्दीहरुलाई थप सीममुलक तालिम सिकाउने र मुडाको बजार व्यवस्थापन गर्न पहल गर्ने जनाएको छ ।
पाँच सय देखि १ हजार सम्मका बिभिन्न साईजका आकर्षक र बलियो मुडा बनाउने गरेका कैदीहरुलाई कच्चा पदार्थको समेत अभाव छ । महंगोमा बाँस, निगालो, टायर लगाएतका कच्चा पदार्थ ल्याउनु परेको कैदीहरुको गुनासो छ । यदि कैदीहरुलाई सीप सिकाउने हो भने जेलमै भित्रै काम गरेर आम्दानी गर्न सकिन्छ भन्ने उदाहारण डडेल्धुराका कैदीबन्दीले दिएका छन् ।
