काठमाडौं । लियोनल मेस्सीको दुई गोलको मद्दतमा स्पेनिस ला लिगा अन्तर्गत भएको खेलमा जित निकाल्दै बार्सिलोनाले शीर्ष स्थानको रियल मड्रिडमाथिको दबाब कायम राखेको छ ।
बुधबार राति घरेलु मैदानमा भएको खेलमा बार्सिलोनाले सेभिल्लालाई ३–० ले हराएर रियल मड्रिडमाथिको दबाब कायम राखेको हो । बार्सिलोनाको जितमा लियोनल मेस्सीले दुई तथा लुइस स्वारेजले एक गोल गरे ।
बार्सिलोनाले तीनै गोल पहिलो हाफमा नै गरेको हो । स्वारेजले २५ औं मिनेटमा गोल गर्दै सुरुवाति अग्रता दिलाए । मेस्सीले २८ र ३३ औं मिनेटमा गोल गर्दै पहिलो हाफमा बार्सिलोनालाई ३–० को अग्रता दिलाए ।
दोस्रो हाफमा दुवै तर्फबाट गोल हुन सकेन । माचिन पेरेज दोहोरो पहेँलो कार्ड खाँदै मैदानबाट बाहिरिएपछि इन्जुरी समयमा सेभिल्ला १० खेलाडीमा सीमित भएको थियो ।
जितपछि शीर्ष स्थानको रियलको २९ खेलबाट ७१ तथा एक खेल बढी खेलको दोस्रो स्थानको बार्सिलोनाको ६९ अंक भएको छ । चौथो स्थानको सेभिल्लाको ३० खेलबाट ५८ अंक छ । यता स्पेनिस ला लिगामा लिग लिडर रियल मड्रिडले विजयी यात्रा कायम राखेको छ ।
लिग अन्तर्गत बुधबार राति भएको खेलमा रियल मड्रिडले लेगानेसलाई ४–२ ले हरायो । रियलको जितमा अल्भारो मोराटाले तीन तथा जेम्स रोड्रिग्वेजले एक गोल गरे । लेगानेसका लागि पिरेस र नेभेसले एक एक गोल गरे ।
क्रिष्टियानो रोनाल्डो, करिम बेन्जिमा तथा ग्यारेथ बेल बिना नै खेलेको रियल मड्रिडका लागि १५ औं मिनेटमा राड्रिग्वेजले गोल गर्दै सुरुवाति अग्रता दिलाएका थिए ।
मोराटाले यो सिजन रियलका लागि १५ गोल गरिसकेका छन् । जितपछि शीर्ष स्थानको रियलको २९ खेलबाट ७१ तथा एक खेल बढी खेलको दोस्रो स्थानको बार्सिलोनाको ६९ अंक छ ।
