काठमाडौं, २७ मंसिर । नेकपा एमालेका नेता शंकर पोखरेलले लोकतन्त्रको सच्चा हिमायती नेपालका वामपन्थी दलहरु हुन भन्ने कुरा निर्वाचन परिणामले पुष्टि गरि दिएको बताएका छन् ।
नेता पोखरेलले नेपाली जनता प्रदेशसभा र प्रतिनिधिसभा निर्वाचनमार्फत् राष्ट्रिय स्वाधिनता र स्वाभिमानको पक्षमा उभिएको जिकिर गरे । उनले बामपन्थी गठबन्धनलाई अधिनायकवाद भन्ने काँग्रेसको आरोपलाई पनि जनमतले खारेज गरिदिएको बताए ।
दाङबाट प्रदेशसभा सदस्यमा निर्वाचन भएका नेता पोखरेलले बुधबार नेपालगंजमा आयोजित एक कार्यक्रमलाई सम्बोधन गर्दै जनताले निर्वाचनमार्फत् राष्ट्रियताको पक्षमा दृढतापूर्वक उभिएको बाम गठबन्धन नेतृत्वको सरकार बनाएर मुलुकलाई समृद्ध बनाउन चाहेको बताए । एमाले नेता पोखरेलले अव मुलुक आर्थिक-सामाजिक विकास र रुपान्तरणको बाटोमा अघि बढने विश्वास व्यक्त गरे ।
