नितेश कर्ण,
पर्सा । भारत बिहार राज्यको पूर्वी चम्पारण छौडादानो नगर पञ्चायत–११ आदापुर बजारबाट ७ जना युवतीलाई पर्सा प्रहरीले उद्धार गरेको हो ।
अर्केष्ट्रामा काम लगाइदिने तथा बढी तलब दिने प्रलोभनमा पारेर ति यूवतीहरुलाई बेच्ने तयारी भइरहेको सूचना प्राप्त भएलगतै भारतीय काउन्टर पाटसँगको सहकार्यमा जिल्ला प्रहरी कार्यालय पर्साको टोलीले आदापुर बजारबाट उनीहरुलाई उदार गरेको हो ।
भदौं ९ गते जिल्ला प्रहरी कार्यालय पर्साबाट खटिएको टोलीले भारतीय प्रहरीसँगको समन्वय र आफन्त नेपाल नामक गैरसरकारी संस्थासँगको सहकार्यमा युवतीको उद्धार गरेको प्रहरी नायब उपरीक्षक ओम प्रकाश खनालले जानकारी दिए ।
‘छौँडादानोमा पुगेपछि मोबाइल खोसी अँध्यारो कोठामा राखेका रहेछन् । भारतकै विभिन्न स्थानमा पठाइ रकम लिइ निजहरूको इच्छा विपरीत अशोभनीय पोशाकमा विना पारिश्रमिक नाचगान गराउने, शारीरिक तथा मानसिक यातना दिइ श्रम शोषण गर्ने तथा बेचबिखन गर्ने उद्देश्यले अन्यत्र पठाउने तयारी भइरहेको रहेछ,’ उनले भने, ‘त्यही समयमा हामीले उनीहरुको उद्धार गर्न सफल भयौं ।’
प्रहरीले उनीहरुलाई झुक्याइ बेचबिखन गर्ने उद्देश्यले लैजाने दुई जना व्यक्तिलाई समेत पक्राउ गरेको छ । प्रहरीले छौडादानो बस्ने २५ वर्षीय विकास भन्ने विकेश कुमार र धनुषाको नगराइन नगरपालिका घर भइ छौडादानो नै बस्दै आएकी ममताकुमारी भन्ने अजिमा खातुनलाई पक्राउ गरेको हो ।
उनीहरू विरुद्ध मानव बेचबिखन तथा ओसार पसारको मुद्दा दर्ता गरी अनुसन्धान प्रक्रिया अघि बढाइएको प्रहरीले जनाएको छ ।