काठमाडौं । नेपाली काँग्रेसका तीन नेताले १४ औं महाधिवेशनका लागि नयाँ समीकरण निर्माणका लागि छलफल जारी राखेका छन् । कांग्रेसका उपसभापति विमलेन्द्र निधि, महामन्त्री शशाकं कोइराला र पूर्वमहामन्त्री प्रकाशमान सिंहबीच अहिले पनि महाराजगञ्जस्थित महामन्त्री कोइरालाको निवासमा छलफल भईरहेको छ ।
गएको सोमबार पनि यी तीन नेताहरुबीच छलफल भएको थियो । यी तीन नेताले आफ्नो समीकरण बनाई महाधिवेशनमा सभापति पदमा विजयी हुने विषयमा छलफल भईरहेको बताइएको छ ।
उपसभापति निधिले आफू सभापति पदमा उठ्ने र देउवालाई समर्थन गर्न आग्रह गरेका थिए । तर देउवा आफै सभापति पदका लागि उम्मेद्वारी दिने निर्णय गरेपछि निधिले कोइराला र सिंहसँग समीकरण बनाउन खोजेका हुन् । यता, कोइराला र सिंह पनि आफू उम्मेद्वार बन्ने दाबी गर्दै आईरहेका छन् ।
त्यसैगरी, वरिष्ठ नेता रामचन्द्र पौडेलले पनि आज आफू पक्षीय नेताहरुलाई बैठक डाकेका छन् । कांग्रेसले १४ औं महाधिवेशनका लागि भदौ १६ देखि १९ गतेसम्म मिति तोकेको छ ।
