काठमाडौं । पूर्वप्रधानमन्त्री एवं नेकपा एमालेका वरिष्ठ नेता झलनाथ खनालको स्वास्थ्यमा क्रमिक सुधार भएको छ । एमाले वरिष्ठ नेता खनाललाई आज देखि अक्सिजन सपोर्टबाट हटाइएको खनालका स्वकीय सचिव कृष्ण भट्टराईले जानकारी गराएका हुन् ।
स्वास्थ्यमा समस्या आएपछि खनाललाई असार २ गते थप उपचारका लागि भारतको राजधानी दिल्ली लगिएको थियो ।
खनालको अहिले दिल्लीस्थित अपोलो अस्पतालमा उपचार भइराखेको छ । पूर्वप्रधानमन्त्री खनालको फोक्सोमा पानी जमेको चिकित्सकले बताएका छन् । फोक्सोमा पानी जमेपछि श्वासप्रश्वासमा समस्या हुँदा उहाँलाई चिकित्सकहरुको सुझाव अनुसार भारतको दिल्ली लगिएको हो ।
