दाङ। दाङमा दोस्रो चरणको कोरोना महामारीबाट १४ पत्रकारहरुमा कोरोना संक्रमण पुष्टि भईसकेको छ ।
ती मध्ये एकको मृत्यु भइसकेको छ भने एकको अवस्था गम्भीर रहेको छ । उनको भैरहवा मेडिकल कलेजमा उपचार भईरहेको शाखाका अध्यक्ष दुर्गालाल केसीले जानकारी दिए ।
त्यस्तै अन्य १२ पत्रकारहरु हाल होम आइसोलेशनमा रहेको उनको भनाइ छ । उनीहरुको अवस्था सुधारोन्मुख रहेको समेत उनले बताए ।
त्यस्तै कतिपय पत्रकारका परिवारहरु समेत संक्रमित भएका छन् । उनीहरुको अवस्था पनि सुधार भईरहेको अध्यक्ष केसीले जानकारी दिए । उनले भने,‘केही साथीहरुलाई घरमा बस्दा परिवारलाई पनि संक्रमण फैलने समस्या भईरहेको छ ।
त्यसैलाई मध्यनजर गरी हामीले महासंघमा ६ बेडको आइसोलेशन तयार पारेका छौं । अरु सबै तयारी पुरा भएको छ, तर अक्सिजनको अभाव भएको छ ।’ आइसोलेशनमा अहिलेसम्म घोराही १५ निवासी शितल रावतले दुई वटा सिलिण्डर उपलब्ध गराएको उनले बताए ।
त्यस्तै अझै कम्तीमा पनि १० वटा अक्सिजन सिलिण्डर आवश्यक परेको उनले बताए ।
