एजेन्सी । भारतमा पछिल्लो २४ घण्टामा कोरोना संक्रमित हुनेको संख्या तीन लाख ३२ हजार ७ सय ३० पुगेको छ । भारतीय स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा गरिएका १७ लाख ४० हजार ५ सय ५० पीसीआर परीक्षणमध्ये ३ लाख ३२ हजार ७ सय ३० मा संक्रमण पुष्टि भएको हो ।
योसँगै भारतमा संक्रमित हुनेको जम्मा संख्या एक करोड ६२ लाख ६३ हजार ६ सय ९५ पुगेको छ ।
त्यसैगरी भारतमा संक्रमणका कारण दैनिक मृत्यु हुनेको संख्या पनि तिब्र रुपमा बढी रहेको छ । पछिल्लो २४ घण्टामा भारतमा दुई हजार २ सय ६३ ले संक्रमितको मृत्यु भएको छ । हालसम्म भारतमा एक लाख ८६ हजार ९ सय २० ले संक्रमणका कारण ज्यान गुमाई सकेका छन् । हाल भारतमा २४ लाख २८ हजार ६ सय १६ सक्रिय संक्रमित रहेका छन् ।
पछिल्लो २४ घण्टामा संक्रमणमुक्त भएका एक लाख ९३ हजार २ सय ७९ सहित भारतमा एक करोड ३६ लाख ४८ हजार एक ५९ संक्रमणमुक्त भैसकेका छन् ।
भारतमा पछिल्लो दिनमा संक्रमणले भयावह रुप लिएसँगै अस्पतालहरुमा स्वास्थ्य उपकरण अत्याधिक अभाव हुन थालेको छ । अस्पतालमा स्वास्थ्य उपकरणका साथसाथै बेड तथा अक्सिजन अभावले पनि मृत्युदर बढ्न थालेको बताइएको छ ।
अक्सिजनको चरम अभावसँगै भारतको नयाँ दिल्लीमा औद्योगिक प्रयोजनका लागि अक्सिजन प्रयोगमा प्रतिबन्ध लगाइएको छ । भारतीय गृह मन्त्रालयले बिहीबार एक सूचना जारी गर्दै एक राज्यबाट अर्को राज्यमा ढुवानीका लागि पनि कुनै अवरोध सिर्जना नगर्न भनिएको छ ।
भारतमा हालसम्म १३ करोड ६४ लाख ७८ हजारभन्दा धेरैले कोरोनाविरुद्धको खोप लगाई सकेका छन् ।
