एजेन्सी, २१ फागुन । इंग्लिश प्रिमियर लिग फुटबलमा चेल्सीले साविक विजेता लिभरपुललाई पराजित गरेको छ । बिहीबार राति भएको खेलमा चेल्सीले लिभरपुललाई उसैको मैदानमा १–० गोल अन्तरले पराजित गरेको हो ।
एनफिल्डमा चेल्सीलाई जित दिलाउन मासन माउन्टले निर्णायक गोल गरे । खेलको ४२ औं मिनेटमा माउन्टले निर्णायक गोल गरेका हुन् । उनले कान्टेको पासलाई सदुपयोग गरे ।
त्यसअघि चेल्सीका लागि टिमो वेर्नरले २४ औं गोल गरेका थिए । तर, अफसाइड हुँदा उनको गोलले मान्यता पाएन ।
जितसँगै चेल्सी २७ खेलबाट ४७ अंक जोड्दै लिगको चौंथो स्थानमा उक्लिएको छ भने लिभरपुल ४३ अंक जोडेर सातौं स्थानमा रहेको छ ।
