काठमाडाैं, ९ फागुन । प्रधानमन्त्री केपी शर्मा ओलीले प्रतिबन्धित नेत्रविक्रम चन्द्र विप्लव पक्षसँग वार्ता गर्ने तयारी गरेसँगै कतिपयलाई छट्पटि भएको टिप्पणी गरेका छन् ।
आइतबार पाँचौ इन्द्रदह पर्यटन महोत्सवलाई सम्बोधन गर्दै प्रधानमन्त्री ओलीले विरोध गर्दै आएको समूहलाई वार्तामा ल्याउँदा केही व्यक्तिलाई छट्पटि भएको टिप्पणी गर्नुभएको छ । विप्लव समूहले शनिबार एक विज्ञप्ति जारी गर्दै सरकारसँग वार्ता गर्न सकारात्मक रहेको जनाउ दिएको थियो ।
प्रधानमन्त्री ओलीले नेकपाको दाहाल–नेपाल पक्षलाई संकेत गर्दै सरकारलाई अवरोध गर्नेहरु पार्टीबाट बाहिरिएपछि मात्रै देश र जनताको पक्षमा उल्लेखनीय काम भइरहेको दाबी समेत गर्नुभयो ।
प्रधानमन्त्री ओलीले फरक राजनीतिक बाटोमा रहेका विप्लव समूहलाई वार्तामा ल्याएर शान्तिपूर्ण राजनीतितर्फ डोर्होयाउन आफूले पहल गरिरहेको बताउनुभएको छ । ओली नेतृत्वको सरकारले यसअघि पृथकतावादी आन्दोलन गरिरहेको सीके राउतको समूहलाई समेत मुलधारमा ल्याउन सफल भएको थियो ।
