काठमाडौं, २ साउन । सत्तारुढ नेकपा स्थायी कमिटी बैठक आज बस्ने भएको छ । प्रधानमन्त्री निवास बालुवाटारमा बिहीबार अध्यक्षद्वय केपी शर्मा ओली र पुष्पकमल दाहाल तथा बरिष्ठ नेता माधव नेपालबीच भएको छलफलमा स्थायी कमिटि बैठक शुक्रबार बस्ने सहमति भएको हो ।
बिहीबारको बैठकमा नेताहरुका अडान कायमै रहेपछि पार्टीको आन्तरिक विवाद सुल्झाउन कुनै सहमति नभएपनि स्थायी कमिटी बैठक बस्ने सहमति भएको थियो । लगातार स्थगित हुदै आएको स्थायी कमिटी बैठक टुंग्याएर सहमतिमै विवाद समाधानका लागि केन्द्रीय कमिटी बैठक बोलाउने बताइएको छ ।
लामो समयदेखि अध्यक्षद्वय केपी शर्मा ओली र पुष्पकमल दाहालबीच भएका छलफलमा समस्या समाधान नभएपछि नेकपाको विवाद केन्द्रीय कमिटीमा जाने भएको हो । गत असार १० गतेबाट सुरु भएको स्थायी कमिटी बैठक असार १४ गतेको प्रधानमन्त्री ओलीको अभिव्यक्तिपछि अवरुद्ध रहँदै आएको छ । बैठक असार १६ गतदेखि बस्न सकेको छैन ।
पछिल्लोपटक असार २६ गतेलाई तय भएको थियो । बाढी, पहिरोका कारण मुलुक आक्रान्त बनेपछि एकसाता बैठक रोकेर आज बस्ने समझदारी भएको थियो ।
