मस्कोको एक रेस्टुरेण्टमा बम विस्फोट, तीन जनाको मृत्यु

रुसको राजधानी मस्कोस्थित एक रेस्टुरेन्टमा भएको बम विस्फोटमा परी तीन जनाको मृत्यु भएको छ भने अन्य २१ जना घाइते भएका छन् । रुसको राष्ट्रिय आतंकवाद विरोधी समिति (एनएसी) ले शनिवार यस घटनाको पुष्टि गरेको हो । एनएसीकाअनुसार मध्य मस्कोको कुद्रिन्स्काया स्क्वायर नजिकै अवस्थित एक रेस्टुरेन्टमा एक महिलाले घरेलु विस्फोटक उपकरण (आईईडी) लैजाने प्रयास गरेकी थिइन् । ती महिलाले रेस्टुरेन्टभित्र छिर्न खोज्दा उक्त उपकरण विस्फोट भएको र उनको घटनास्थलमै मृत्यु भएको थियो ।
विस्फोटमा ज्यान गुमाउने अन्य दुई व्यक्तिमध्ये एक जना सुरक्षा गार्ड रहेका छन्, जसले ती महिलालाई विस्फोटक पदार्थसहित रेस्टुरेन्टमा प्रवेश गर्नबाट रोकेका थिए । त्यस्तै, तेस्रो मृतक रेस्टुरेन्टमा आएका एक ग्राहक रहेको जनाइएको छ ।
यसअघि सार्वजनिक भएका प्रारम्भिक विवरणहरूमा कुद्रिन्स्काया स्क्वायर क्षेत्रमा रहेको एक समर क्याफे नजिकै विस्फोट भएको र १५ जना घाइते भएको बताइएको थियो । यद्यपि, एनएसीको पछिल्लो आधिकारिक तथ्याङ्कअनुसार घाइते हुनेहरूको संख्या २१ पुगेको छ ।