मध्यपूर्वमा जारी द्वन्द्व तत्काल अन्त्य गर्न संयुक्त राष्ट्रसंघको आह्वान

संयुक्त राष्ट्रसंघका महासचिव एन्टोनियो गुटेरेसले मध्यपूर्वका सबै मोर्चाहरूमा जारी युद्ध तत्काल रोक्न आह्वान गर्नुभएको छ । खाडी क्षेत्रमा सैन्य तनाव बढेको ६ महिना पुग्नै लाग्दा, क्षेत्रीय द्वन्द्वका रूपमा शुरु भएको यो संकटले अहिले विश्वव्यापी अस्थिरता निम्त्याइरहेको उहाँले चेतावनी दिनुभयो । शुक्रवार आयोजित कार्यक्रममा बोल्दै महासचिव गुटेरेसले हर्मोज जलसन्धिबाट हुने व्यापार धराशायी भएको र ऊर्जा बजारमा व्यापक उथलपुथल आएको उल्लेख गर्नुभयो । द्वन्द्वकै कारण खाद्य सामग्री र प्रमुख रासायनिक मलको मूल्यमा भारी वृद्धि भएको तथा आपूर्ति शृङ्खला अवरुद्ध बनेको उहाँको भनाइ छ ।
महासचिव गुटेरेसले विश्व खाद्य कार्यक्रम (डब्लुएफपी) को प्रतिवेदन उद्धृत गर्दै यो संकटका कारण करिव ४ करोड ५० लाख मानिसले गम्भीर खाद्य असुरक्षाको सामना गर्नुपर्ने बताउनु भयो । साथै, बढ्दो महँगी र सुस्त आर्थिक वृद्धिका कारण थप लाखौँ मानिस गरिबीको रेखामुनि धकेलिन सक्ने जोखिम रहेको उहाँले औंल्याउनु भयो ।
अमेरिकी राष्ट्रपतिद्वारा हालै सार्वजनिक गरिएको सम्झौतालाई सकारात्मक समाचारको रूपमा लिँदै उहाँले यसको स्वागत गर्नुभएको छ । उक्त सम्झौतामा हमासले हतियार त्याग्ने र इजरायलले गाजाबाट आफ्ना सेना फिर्ता गर्ने उल्लेख छ ।
महासचिवले भन्नुभयो, ‘यी लक्ष्यहरू प्राप्त गर्नका लागि कार्ययोजना (रोडम्याप) घोषणा भइसकेको छ । उक्त कार्ययोजनालाई कुनै पनि आशंका वा अवरोधविना पालना गरिनुपर्छ। अब दुवै पक्षले सहमति कार्यान्वयन गर्ने समय आएको छ ।’
महासचिव गुटेरेसले मध्यपूर्वमा जारी सबै प्रकारका लडाइँ रोकिनुपर्नेमा पुनः जोड दिनुभयो । उहाँले हर्मोज र बाब अल–मन्दब जलसन्धिमा अन्तर्राष्ट्रिय नौवहन अधिकार र स्वतन्त्रता पूर्ण रूपमा पुनःस्थापना हुनुपर्ने र समस्या समाधानका लागि कुटनीतिक प्रयासलाई प्राथमिकता दिनुपर्ने माग समेत गर्नुभएको छ ।