काठमाडौं, फागुन १६। चौथो नेपाल–बंगलादेश युवा सम्मेलन काठमाडौंमा चलिरहेको छ।
कोभिड–१९ का कारण प्रभावित हुँदै आएको सम्मेलनमा दिगो विकास लक्ष्य, जलवायु परिवर्तन तथा प्रकोप नियन्त्रण, युवा सहभागिता र उद्यमशील विकासका विषयमा शनिबारदेखि छलफल सुरु भएको हो ।
युवा विकास केन्द्र र साउथ एसिया पार्टनरसिप साप नेपालको आयोजना तथा बंगलादेश राजदूतावास, नेपाल पर्यटन बोर्ड र राष्ट्रिय युवा परिषद्को सहकार्यमा हुने सम्मेलनमा दुई देशको व्यापारका सम्बन्धमा युवाको भूमिकाका विषयमा समेत छलफल भएको बताइएको छ ।
साथै सम्मेलनमा दुवै देशका कलाकारले लोक संस्कृति प्रस्तुत गर्ने कार्यसूची रहेको आयोजकले जनाएको छ । सम्मेलनमा २५ बंगलादेशी युवासहित ६५ जनाको सहभागिता रहेको छ । यसअघि पहिलो र तेस्रो सम्मेलन पनि काठमाडौंमा नै भएको थियो भने पाँचौं संस्करण भने बंगलादेशमा बि.सं २०७८ को सुरूवात मै हुने जनाइएको छ ।
