एजेन्सी, ३० भदौ । यौन शोषण मामिलामा २० वर्षको जेल सजाय भोगिरहेका भारतीय ‘ढोंगी बाबा’ गुरमीत रामरहीम सिंहलाई उनकी आमाले भेट गरेकी छिन् ।
रारहीमकी आमा नसीब कौरलाई रोहतकको जेलमा उनका ड्राईभर इकबाल सिंहले लगिदिएका थिए । स्रोतका अनुसार आमालाई देखेपछि रामरहीम भक्कानिँदैै रोएका थिए । रामरहीमले आमासँग नजर मिलाउन समेत नसकेको खबर बाहिरिएको छ ।
जेलमा प्रवेश गराउनु पहिले नसिब कौरको खानतलासी गरिएको थियो । उनी छोराको लागि केही खानेकुरा लिएर जेल पुगेकी थिइन् । रामरहीमको परिवारका कोही पनि सदस्य उनलाई भेट्न अहिलेसम्म जेल पुगेका थिएनन् ।
आफ्नै भक्तलाई बलात्कार गरेर दोषी ठहर भएपछि रामरहीम अहिले २० वर्षको जेल सजाय भोगिरहेका छन् । सच्चा सौदा डेराका सञ्चालक समेत रहेका रामरहीमलाई जेल चलान गरेपछि भड्किएको हिंसामा ३८ जनाको मृत्यु भएको थियो ।
