काठमाडौं, १३ मंसिर । प्रधानमन्त्री केपी शर्मा ओलीको स्वास्थ्य अवस्थामा उल्लेख्य सुधार आएको छ । महाराजगन्जस्थित मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा गत मंगलबार एपेन्डिसाईटिसको शल्यक्रिया गर्नु भएका प्रधानमन्त्री ओलीको स्वास्थ्य अवस्थामा उल्लेख्य सुधार आएको अस्पतालले जनाएको छ ।
अस्पतालका चिकित्सक अरुण सायमीले बिहीबार प्रधानमन्त्री ओली सामान्य हिडन र खाना खान सक्ने हुनुभएको जानकारी दिनुभयो । उहाँले प्रधानमन्त्री ओलीलाई अझै सघन उपचार कक्षमा नै राखिएको पनि बताउनुभयो ।
यसैबीच राष्ट्रपति विद्यादेवी भण्डारीले प्रधानमन्त्री केपी ओलीको स्वास्थ्य अवस्थाबारे जानकारी लिनुभएको छ । बिहीबार बेलुका त्रिवि शिक्षण अस्पताल परिसरमा रहेको मनमोहन कार्डियो सेन्टरमा पुगेर प्रधानमन्त्री ओलीको स्वास्थ्य अवस्थाबारे जानकारी लिनुका साथै स्वास्थ्य लाभको कामना समेत गर्नुभएको हो ।
