विराटनगर, २८ फागुन । साफ महिला च्याम्पियनसिप फुटवलको उदघाटन खेलमा नेपालले भुटानलाई ३-० गोल अन्तरले पराजित गरेको छ । मंगलवार विराटनगरको शहिद रंगशालामा भएको खेलमा नेपालले भुटानलाई ३–० गोल अन्तरले पराजित गरेको हो ।
नेपालको जितमा कप्तान निरु थापा, सावित्रा भण्डारी र मञ्जलीकुमारी योञ्जनले गोल गरे । नेपालले मध्यान्तरसम्म दुई गोल र मध्यान्तरपछि थप एक गोल गरेको हो । खेलको १३ औं मिनेटमा मञ्जलीको गोलमा नेपालले अग्रता लिएको थियो ।
१६ औं मिनेटमा सावित्रा भण्डारीले गोल थप्दै नेपालको अग्रता दोब्बर पारिन् । खेलको ५५ औं मिनेटमा कप्तान निरु थापाले गोल गर्दै नेपालको जीत सुनिश्चित गरेकी थिइन् ।
यता, भुटानले भने एक पटक पनि नेपालको पोष्टमा प्रहार गर्न सकेन । नेपालले अब समूह चरणको अन्तिम खेलमा मार्च १६ तारिख बंगलादेशसँग खेल्दैछ ।
