काठमाडौं, २६ फागुन । प्रतिनिधिसभाका सभामुख कृष्ण बहादुर महराले मधेस आन्दोलनको अध्ययन प्रतिवेदन संसदमा प्रस्तुत गर्न सरकारलाई रुलिङ गरेका छन् । आईतबारको प्रतिनिधिसभाको बैठकमा राजपाका सांसदहरुले मधेस आन्दोलन प्रतिवेदन सदनमा पेस नभएसम्म बैठक चल्न नदिने भन्दै उभिएर विरोध जनाएपछि सभामुखले त्यस तर्फ सरकारको ध्यानाकर्षण गराएका हुन् ।
बैठक सुरु हुने वित्तिकै राजपाका सांसद महेन्द्र राय यादवले मधेस आन्दोलनको अध्ययन प्रतिवेदन सदनमा पेश गर्नका लागि सरकारलाई रुलिङ गर्न सभामुखको ध्यानाकर्षण गराएका थिए । त्यसपछि सभामुख महराले त्यसबारे सरकारको ध्यानाकर्षण गराएका हुन् ।
मधेस,थरुहट आन्दोलनको सत्य तथ्य छानविन गर्न सरकारले पूर्व न्यायाधीश गिरिशचन्द्र लालको संयोजकत्वमा उच्चस्तरीय छानबिन आयोग गठन गरेको थियो । राजपाले सो आयोगको अध्ययन प्रतिवेदन संसदमा पेस गर्नका लागि सभामुखको रुलिङ माग गरेको हो ।
