स्याङजा, ७ कात्तिक । स्याङजाको हरिनास गाउँपालिकाका अध्यक्ष खिमनारायण मानन्धरले प्रहरी माथि नै हातपात गरेका छन् । हरिनासकै वडा नम्वर ६ दग्दीमा भएको भलिवल प्रतियोगितामा सामान्य विवाद हुँदा अध्यक्ष मानन्धरले प्रहरी माथि हातपात गरेका हुन् । आक्रमणवाट दार्सिङ प्रहरी चौकीका जवान रामनारायण चौधरी सामान्य घाईते भएका छन् ।
क्याक्मी र दार्सिङका युवाहरुबीच खेलका क्रममा विवाद उत्पन्न भएको थियो । सो विवादलाई रोक्न नसकेको भन्दै प्रहरी माथि आक्रमण भएको हो । घटनावारे छानविन भईरहेको स्याङजाका प्रहरी प्रमुख जयराज सापकोटाले जानकारी दिए ।
गाउँपालिकाका अध्यक्ष खिमनारायण मानन्धरले प्रहरी माथि कुटपीट गरेको स्वीकार गरेका छन् । उनले प्रहरी नै आक्रमणकारीको संरक्षणमा लागेकाले घटना हुन पुगेको आरोप लगाएका छन् । मानन्धर तत्कालिन नेकपा एमालेवाट अध्यक्षमा निर्वाचित भएका हुन् ।
