नवलपरासी, ७ फागुन । नवलपरासीको महेसपुर भन्सारमा स्थानीय र प्रहरीबीच झडप भएको छ । झडपका कारण प्रहरीले १० राउण्ड अश्रु ग्यास र १ राउण्ड गोली चलाएको छ ।
भन्सारमा कपडाको विवादलाई लिएर स्थानीयले अवरोध गरेपछि प्रहरीले आश्रु ग्यास र गोली चलाउनु परेको जनाएको छ । झडपमा परि तीन जना स्थानीय घाइते भएका छन् ।
भन्सारको गोदामा स्टक राखिएको ५० लाख बराबरको ५२ पोका कपडा र १५ बोरा कपडा प्रहरीले भैरहवा भन्सारमा लैजान खोज्दा स्थानीयले अवरोध गरेपछि झडप भएको हो ।
स्थितिलाई नियन्त्रणमा लिन फायरिङ गरिएको जिल्ला प्रशासन कार्यालयको भनाई छ । सो नाकाबाट व्यापारी र कर्मचारीको सेटिङमा भारतबाट सामान आयत हुने गरेको स्थानीयले आरोप लगएका छन् ।