काठमाडौं । नेपाल आयल निगमले हवाई इन्धनको मुल्य घटाएसँगै नीजि क्षेत्रका वायुसेवा कम्पनीहरुले भाडा घटाएका छन् । आयल निगमले हवाई इन्धनको मुल्य प्रतिलिटर २० रुपैयाँ घटाएको छ । नयाँ भाडादर आगामी पुस २७ गतेबाट लागु हुनेछ ।
नयाँ भाडादर अनुसार काठमाडौं माउन्टेन फ्लाइट ६८५ रुपैयाँले घटेर १४ हजार २०५ रुपैयाँ कायम भएको छ । त्यस्तै, काठमाडौंबाट पोखराको हवाई भाडा ३ सय २० रुपैयाँ घटेको छ । नयाँ भाडादर अनुसार ६ हजार ६सय ६५ रुपैयाँ कायम भएको छ ।
त्यसैगरी, काठमाडौंबाट विराटनगरको ४ सय ८५ रुपैयाँले भाडा घटेर ९ हजार ७ सय २० रुपैयाँ कायम भएको छ । काठमाडौंबाट नेपालगन्जको फ्लाइटमा ६सय ५५ रुपैयाँ भाडा घटेर १३ हजार ३२५ रुपैयाँ नयाँ भाडादर कायम भएको छ ।
वायुसेवा सञ्चालक संघका अनुसार काठमाडौंबाट धनगढीको उडानमा सबैभन्दा धेरै ८८५ रुपैयाँ भाडा घटेको छ ।
