काठमाडौं । अमेरिकी राष्ट्रपति डोनाल्ड ट्रम्पले रक्षा खर्च बढाउने तयारी गरेका छन् ।
सन् २०१८ का लागि प्रस्तावित बजेटमा राष्ट्रपति ट्रम्पले रक्षा खर्चमा ५४ अर्ब डलर अर्थात झण्डै १० प्रतिशत रकम बढाउने तयारी गरेका हुन् । वैदेशिक सहायता, पर्यावरणीय सुरक्षाका लागि गरिने खर्चसहित अन्य क्षेत्रको बजेट कटौती गरेर रक्षा खर्च बढाउने प्रस्ताव ट्रम्पको छ ।
ट्रम्पले बजेट सेना, सुरक्षा र आर्थिक विकासमा केन्द्रित रहने बताउँदै आएका छन् । सरकारी निकायसँगको परामर्शपछि ट्रम्पले आउँदो मेमा बजेटको प्रस्ताव कांग्रेसमा पेश गर्ने तयारी गरेको अमेरिकी सञ्चारमाध्यमले जनाएका छन् ।
अहिले अमेरिकाको रक्षा बजेट वार्षिक ६ सय ३ अर्ब डलर छ । अमेरिकामा सन् २०१२ देखि लगातार रक्षा खर्च कटौती हुँदै आएको थियो । तर ट्रम्पले सत्ता सम्हालेपछि भने बजेट बढाउने तयारी भएको हो ।
ट्रम्पले चुनावी अभियानको क्रममा कर कटौती गर्ने दाबी गरेका थिए । यसले राष्ट्रिय कर्जा बढ्न सक्नेछ । उनले पूर्वाधार विकासमा पनि खर्च बढाउने बताउँदै आएका छन् ।
ट्रम्पको आधारभुत आर्थिक योजनाका कारण अमेरिकी शेयर बजार लगातार बढी रहेको छ । गएको १२ दिनदेखि अमेरिकी शेयर बजार कीर्तिमानी स्तरमा पुगेर बन्द भएको छ ।
