काठमाडौं । इंग्लिस प्रिमियर लिग लिडर चेल्सी एफए कप फुटबलको क्वाटरफाइनलमा प्रवेश गरेको छ । शनिबार राति भएको पाँचौं चरणको खेलमा उल्फलाई २–० ले हराएर चेल्सीले अन्तिम ८ मा स्थान पक्का गरेको हो ।
चेल्सीको जितमा पेड्रो र डिएगो कोस्टाले गोल गरे । पहिलो हाफमा गोलरहित बराबरीमा रोकिएको चेल्सीका लागि ६५ औं मिनेटमा पेड्रोले पहिलो गोल गरे ।
८९ औं मिनेटमा कोस्टाले गोल गरेपछि चेल्सी २–० ले विजयी भयो ।
चेल्सीले क्वाटरफाइनलमा स्थान बनाएपनि प्रिमियर लिगको शीर्ष स्थानकै होडमा रहेको म्यानचेस्टर सिटीले भने रिप्ले खेल्नु पर्ने भएको छ ।
राति नै भएको खेलमा म्यानचेस्टर सिटी भने हर्ड्सफिल्ड टाउनसँग गोलरहित बराबरीमा रोकियो । सिटीले अब क्वाटरफाइनल प्रवेशका लागि रिप्ले खेल्नु पर्नेछ ।
राति नै भएको अर्को खेलमा अक्सफोर्ड युनाइटेडलाई ३–२ ले हराएको मिडल्सबर्गले पनि क्वाटरफाइनलमा स्थान बनाएको छ ।