सर्लाही । सर्लाहीमा बुधबार बिहान इँटा उद्योगको खाल्डोमा जमेको पानीमा डुबेर दाजुभाइको मृत्यु भएको छ । सदरमुकाम मलंगवा नगरपालिका–११ गम्हरिया पल्सी टोलमा बुधबार बिहान इँटा उद्योगको खाल्डोमा जमेको पानीमा डुबेर दुई बालकको मृत्यु भएको छ ।
स्थानीय सदाम अन्सारीका आठ वर्षीय छोरा रेआज अन्सारी र छ वर्षीय छोरा नेआज अन्सारीको गाउँ नजिकै रहेको इँटा उद्योगको चिम्नी भट्टाको खाल्डोमा जमेको पानीमा डुबेर मृत्यु भएको जिल्ला प्रहरी कार्यालय सर्लाहीले जनाएको छ ।
मृतक बालकहरुको शव पोष्टमार्टमका लागि जिल्ला अस्पताल मलंगवा राखिएको छ । बालकहरुको डुबेर मृत्यु भएको इँटा उद्योग पूर्व सभासद् जंगिलाल रायको रहेको गम्हरियाका वडाध्यक्ष नन्दकिशोर रायले बताए ।
इँटा उद्योगमा कामदारहरु भएको समयमा कसैलाई पनि छेउछाउमा आउन नदिने गरेको भएपनि बिहान भने उद्योगमा कामदारहरु नभएको समयमा बालकहरु पौडी खेल्न जाँदा घटना भएको गम्हरियाका वडाध्यक्ष रायले जानकारी दिए ।
