काठमाडौं । पछिल्लो समय विभाजन निकट पुगेको जनता समाजवादी पार्टी जसपाका अध्यक्षद्वय महन्थ ठाकुर र उपेन्द्र यादवबीच भेटवार्ता सुरू भएको छ।
पार्टी कार्यालय बालकुमारीमा दुईअध्यक्षबीच भेटवार्ता भईरहेको हो । पार्टीका ठाकुर र राजेन्द्र महतो पक्ष र यादव बावुराम भट्टराई पक्षबीच विवाद बढ्दै गएको छ ।
पार्टीमा रहेको मतभिन्नता तथा पार्टीमा विकसित पछिल्लो घटनाक्रमबारे छलफल केन्द्रीत रहेको बताइएको छ ।
यसअघि शनिबार यादव–भट्टराई पक्षले कार्यकारिणी समितिको बैठक बोलाएको थियो भने ठाकुरले विज्ञप्ति जारी गर्दै कुनै बैठक नबोलाइएको बताएका थिए । त्यसैगरी ठाकुर पक्षले शुक्रबार राजेन्द्र महतोलाई संसदीय दलको नेता चयन गरेको थियो तर हिजो नै यादव पक्षले विज्ञप्ति जारी गर्दै कसैलाई संसदीय दलको नेता चयन नगरिएको बताएका थिए ।
प्रधानमन्त्री केपी शर्मा ओलीलाई विश्वासको मत दिने विषयमा सतहमा आएको जसपाको विवाद कांग्रेस नेतृत्वको गठबन्धनको सरकार निर्माणमा ठाकुर पक्षले समर्थन नगरेपछि उत्कर्षमा पुगेको छ ।
गएको बैशाख २७ गते प्रधानमन्त्री ओलीले सदनबाट विश्वासको मत मागेका बेला ठाकुर पक्ष तटस्थ रहेको थियो भने यादव पक्षले विपक्षमा मतदान गरेका थिए ।
त्यसैगरी यादव पक्षले कांग्रेस नेतृत्वको गठबन्धनको सरकार निर्माणको कसरतमा लागेका बेला ठाकुर पक्षले समर्थन गर्न अस्वीकार गरेका थिए । जसकारण गठबन्धनको सरकार निर्माण असफल भएको थियो र ओली नै पुनः प्रधानमन्त्री नियुक्त भएका थिए ।