एजेन्सी । भारतको एक अस्पतालमा अक्सिजन अभावले २० जना कोभिड संक्रमितको ज्यान गएको छ । राजधानी दिल्ली स्थित जयपुर गोल्डेन अस्पतालमा अक्सिजन अभावले बेडमा भएका ती विरामीको ज्यान गएको भारतीय सञ्चार माध्यमहरुले जनाएका छन् ।
अस्पतालको अक्सिजन सप्लाई प्लान्टमा अक्सिजन सकिएपछि ती विरामीले पर्याप्त अक्सिजन पाएनन्, त्यसपछि उनीहरुको ज्यान गएको हो ।
जयपुर गोल्डेन अस्पतालका मेडिकल सुपरिटेन्डन्ट डा. डिके बलुजाले अक्सिजनको प्रेसर कम भएका कारण २० जना विरामीको ज्यान गएको जानकारी दिएको भारतीय सञ्चार माध्यमले जनाएका छन् । प्लान्टमा अक्सिजन सकिएपछि त्यसले जुन प्रवाहसाथ अक्सिजन प्रवाह गर्नुपर्ने हो त्यो गर्न नसक्नुलाई प्रेसर कम भएको भनिन्छ ।
पछिल्लो हप्ता दिल्लीमा अक्सिजनको सबैभन्दा बढी अभाव झेलिरहेको अस्पताल हो गोल्डेन जयपुर । यो अस्पतालले चाहिने भन्दा ६० प्रतिशत थोरै अक्सिजन पाइरहेको छ ।
आइ.एन.ए
