काठमाडौँ, २० असोज । भारतका लागि नेपाली राजदूत दीपकुमार उपाध्यायले पदबाट राजीनामा दिएका छन् ।
प्रतिनिधिसभा निर्वाचनमा नेपाली कांग्रेसबाट उम्मेदवार बन्ने तयारीमा रहनुभएका उपाध्यायले परराष्ट्र मन्त्रालयमा राजीनामा बुझाउनुभएको हो ।
उपाध्यायको राजीनामा उपप्रधानमन्त्री तथा परराष्ट्रमन्त्री कृष्णबहादुर महराले शुक्रबारनै प्रधानमन्त्री कार्यालयमा बुझाएका छन् ।
कांग्रेस नेतासमेत रहुनुभएका उपाध्याय गत संविधानसभा निर्वाचनमा कपिलवस्तु–१ मा पराजित भएका थिए । तर, तत्कालीन सुशील कोइराला नेतृत्वको सरकारले उहाँलर्ई भारतका लागि नेपाली राजदूत बनायो ।
आफ्नो सरकार ढाल्न भूमिका खेलेको भन्दै केपी ओली नेतृत्वको सरकारले उपाध्यायलाई राजदूतबाट फिर्ता बोलाउने निर्णय समेत गरेको थियो ।
कांग्रेसको समर्थनमा माओवादी केन्द्रका अध्यक्ष पुष्पकमल दाहाल प्रधानमन्त्री भएपछि फेरि उपाध्याय नै राजदूत नियुक्त भएका थिए । राजदूत नियुक्त भएको ११ महिनापछि चुनाव लड्न भन्दै उपाध्यायले राजीनामा दिएका हुन् ।