काठमाडौं, १० असोज । नेकपा एमालेका वरिष्ठ नेता माधवकुमार नेपालले माओवादी केन्द्रसँग सम्बन्ध सुधार गरेर जान आफ्नो पार्टी तयार रहेको बताएका छन् ।
वरिष्ठ नेता नेपालले आसन्न प्रदेश सभा र प्रतिनिधि सभा निर्वाचनमा पनि माओवादी केन्द्रसँग तालमेल गरेर जान आफ्नो पार्टी तयार रहेको बताए ।
मंगलबार चितवनको भरतपुर विमानस्थलमा स्थानीय संचारकर्मीमाझ संक्षिप्त कुराकानी गर्दै उनले आसन्न प्रदेश सभा र प्रतिनिधि सभा निर्वाचनमा कुनै एउटा दलले मात्रै सरकार बनाउने अवस्था नरहेकाले आफ्नो पार्टीले बामपन्थी दलहरुबीच चुनावी तालमेल गर्न चाहेको स्पष्ट पारे ।
वरिष्ठ नेता नेपालले प्रतिनिधि सभा निर्वाचनमा आफूले रौतहट वा काठमाडौं मध्ये कुनै एउटा निर्वाचन क्षेत्रबाट उम्मेदवारी दिने जानकारी दिए ।
