मोरङ, २० असोज । कोरोना भाइरस संक्रमणबाट मोरङ र सुनसरीमा गरी ३ जनाको मृत्युु भएको छ । मृत्यु हुनेमा मोरङका दुई जना र सुनसरीका एक जना छन् ।
मोरङको विराटनगरस्थित नोबेल मेडिकल कलेजको आइसोलेसनमा उपचाररत मोरङका दुई जना कोरोना संक्रमितको आज बिहान मृत्यु भएको हो । कानेपोखरी गाउँपालिका-६ का ५० वर्षीय पुरुष र सुन्दर हरैँचा-४ का ४५ वर्षीय पुरुषको कोरोनाबाट मृत्यु भएको हो ।
अस्पतालका जनसम्पर्क अधिकृत नारायण दाहालका अनुसार क्यान्सर रोगबाट पीडित कानेपोखरीका ति पुरुषलाई ज्वरो आएपछि सोमबार उपचारका लागि अस्पताल भर्ना गरिएको थियो ।
उता सुन्दरहरैँचाका ४५ वर्षीय पुरुषलाई ज्वरो, निमोनिया र टाइफाइड भएपछि असोज १३ गते उपचारका लागि अस्पताल भर्ना गरिएको थियो । आईसीयूमा राखेर उपचार गर्दा गर्दै आज बिहान उनको मृत्यु भएको हो ।
त्यसैगरी बीपी कोइराला स्वास्थ्य विज्ञान प्रतिष्ठान धरानमा एकजना कोरोना संक्रमितको आज बिहान मृत्यु भएको छ । सुनसरीको धरान–३ का ६४ वर्षीय पुरुषको मृत्यु भएको प्रतिष्ठानका सह–प्रवक्ता आशिष श्रेष्ठले जानकारी दिनुभयो ।
ती पुरुषमा असोज १२ गते कोरोना संक्रमण पुष्टि भएको थियो । उनी डायबिटिज र टिबी रोगबाटसमेत पीडित रहेको प्रतिष्ठानले जनाएको छ ।
