काठमाडौं, ३ माघ । अधिकारकर्मीहरुले नेकपाका अध्यक्ष पुष्पकमल दाहाल प्रचण्डले जनयुद्धमा मारिएका १७ हजारमध्ये ५ हजारको मात्र जिम्मेवारी लिने अभिव्यक्ति दिनुले संक्रमणकालिन न्याय व्यवस्थामा संशय पैदा गरेको भन्दै चिन्ता व्यक्त गरेका छन् ।
माओवादी द्धन्द्ध कालमा मारिएका शिक्षक मुक्तिनाथ अधिकारीको १८औं स्मृति दिवसका अवशरमा राजधानीमा आयोजित एक कार्यक्रममा सहभागी अधिकारकर्मीले यस्तो चिन्ता प्रकट गरेका हुन् ।
कार्यक्रममा पूर्व सभामुख दमननाथ ढुंगानाले दाहालले ५ हजारको मात्रै जिम्मा लिन्छु भन्ने अभिव्यक्ति स्पष्ट नभएको उल्लेख गर्नुभयो ।
राष्ट्रिय मानवअधिकार आयोगका सदस्य प्रकाश वस्तीले नेताहरुको कार्यशैली देखेर डराउनुपर्ने अवस्था सिर्जना भएको बताउनुभयो ।
पूर्व न्यायाधीवक्ता मुक्ति श्रेष्ठले सत्य निरुपण आयोग र बेपत्ता पारिएका व्यक्तिको छानबिन आयोगका पदाधिकारी चयनमा विलम्ब नगर्न आग्रह गर्नुभयो ।
