पूर्वाधारको क्षेत्रमा गरिएको ऋण लगानीले आर्थिक गतिविधिलाई चलायमान बनाउँछः अर्थमन्त्री

अर्थमन्त्री डा. स्वर्णिम वाग्लेले पूर्वाधारको क्षेत्रमा गरिएको ऋण लगानीले आर्थिक गतिविधिलाई चलायमान बनाउने बताउनुभएको छ ।
आईतवार प्रतिनिधि सभा बैठकमा राष्ट्र ऋण उठाउने विधेयक, २०८३ माथिको छलफलमा सांसदहरुले उठाएका प्रश्नको जवाफ दिने क्रममा उहाँले उक्त कुरा स्पष्ट पार्नुभएको हो । अर्थमन्त्री वाग्लेले सरकारले पूर्वाधारको क्षेत्रमा उक्त ऋण लगानी गरेको र त्यसले आर्थिक गतिविधिलाई चलायमान बनाउने दाबी समेत गर्नुभयो । बैठकमा सांसदहरुले वैदेशिक ऋण अनुपादक क्षेत्रमा नलगाउन सरकारलाई सचेत गराएका थिए । अर्थमन्त्री वाग्लेले सरकार उक्त कुरामा सचेत रहेको बताउनु भयो । अर्थमन्त्री वाग्लेले सरकारले पछिल्लो समय वैदेशिक लगानी बिना पनि विभिन्न आयोजनाहरुको कामलाई अघि बढाउने आँट गरेको पनि बताउनु भयो ।
उहाँले भन्नुभयो,‘विदेशी ऋण निश्चित आयोजनाका लागि नै आउँछ । निश्चित आयोजनाहरु मूलत पूर्वाधारमा नै छन् । पूर्वाधारहरुले अर्थतन्त्रको गतिविधिलाई चुस्त बनाउने, प्रभावकारी बनाउने, दुरी छोटयाउने, लागत घटाउने काम गर्दछ । तर यो भन्दैमा सधै यस्तो नदेखिने पनि गरेको छ । ऋण लिएर बनाइएको २/२ वटा एयरपोर्टको हालत कुन पृष्ठभूमिमा कसले कसरी, किन ? ती आयोजनाहरु लिए भन्नेबारेमा हामीले गर्नुपर्ने नै हुन्छ । त्यसैले हामीले निगरानी गर्नु पर्ने नै हुन्छ । ऋण लिएर पूर्वाधारमा नै खर्च गर्ने हामीले सोचिराखेका छौँ । र नेपाल भित्रै उठाउने आन्तरिक ऋण पनि हामीले नेपाल सरकारको नै खर्चमा हुने जलविद्युत आयोजनाहरु होलान्, पूर्वपश्चिम राजमार्गहरु होलान् । पहिला पहिला हामी यति ठूला आयोजनाहरु आँटननै सक्ने थिएनौ । वैदेशिक अनुदान नै बन्थे । पृथ्वी राजमार्ग चिनियाँ अनुदानमा बनेको हो । महेन्द्र राजमार्ग ६०÷७० प्रतिशत भारतीय अनुदानमा बन्यो । खण्ड, खण्ड बेलायती सरकार, अमेरिकी सरकार, रुसी सरकारको अनुदानमा बनेको हामीलाई थाहा छ । उद्योग विशेष पनि वैदेशिक अनुदानमानै बनेका हुन । अहिले पछिल्लो समय हाम्रो विप्रेशन आउन थालेपछि अलि सुदृढ भएपछि नेपालले आफनै खर्चमा पनि ठूला पूर्वाधारहरु आँटेको हो । तामाकोशी जलविद्युत आयोजना भन्नुस, मध्य पहाडी राजमार्ग भन्नुस । पश्चिमतिरका केही सिंचाई आयोजनाहरु भन्नुस । वैदेशिक संलग्नता नखोजी नेपाल आफैँले गरेको पनि हो । तर मूलतः ऋण हामीले उत्पादनमूलक क्षेत्रमा नै लगाएका छौँ ।’
अर्थमन्त्री वाग्लेले वैदेशिक ऋण अनावश्यक क्षेत्रमा लगानी नगर्नका लागि सरकारलाई सचेत गराउन पनि सांसदहरुलाई आग्रह गर्नुभयो ।